دعوه عااامه >> تعالوا شوفوا فضايح الشباب <<

بسم الله الرحمن الرحيم

حبيبى قلبى المشاهد

اختى المشاهده

.....

ازاى يا واد وازاى بنت تكونى روشه

اول حاجه معلش بقى للشباب انا هتكلم ازاى الواحد يكون واد روش

عاوز تكون روش خليك معانا

طبعا احنا فى اول التوبيك بقدم شكر

لجمهوريه مصر العربيه

طب على ايه

والله البلد تعبانه عشان خاطر الشباب

وعماله تبنى قهاوى للعاطلين

بلاش نشكرها يعنى ... احنا مش اندال

يا جماعه بجد والله البلد موفره لينا حاجات كتير

ده حتى الريس قال فى التليفزيون انه مش هيلغى الدعم

الحاجه اللى نفسى اعرفها الدعم ده فيـــــــــــــــــن

طبعا اكتر رجال الاعمال بيكون ليهم كرش ..

مش من اكل اللحوم والكلام ده

من كتر اكل الاموال

سترك يا رب

المهم

الشاب من هنا لهنا بيلاقى نفسه صايع مفيش حاجه وراه غير انه يسبسب شعره قدام المرايه

وينزل على الناصيه

تعالى بقى هنا هديلك كام نصيحه عشان لبنت لما تشوفك تقول اوووه كوووول

هو ده خروف احلامى

فى واحده اسمها سوسن هتكون معانا فى الحوار

هتقولى سوسن دى مين هقولك سوسن دى اعتبرها الكيبورد مزه الماوس

اى حاجه .. بس غصب عنك هى فى الموضوع

ايووووووووووووه
(ايوه كلمه اسكندرانيه بمعنى ... ايوه يا جداعان J)

ازاى هتكون روش

الخطوه الاولى

من ناحيه الملابس

على الشاب ان يعلم ان روشنته تقاس بملابسه

وطبعا زي ماكلنا عارفين ان فيه مثل بيقول كل اللى يعجبك و البس اللى يعجب الناس ،، وانا من هنا

بقوله كل اللى يعجبك والبس اللى يعجبك برضه

ولانك شاب روش تأكد تماما ان الى هتلبسه هيقرف الناس ..

انت كشاب لبسك غالبا بيكون مكون من طبقتين ومن دورين فقط

نتكلم عن الدور الارضي اولا ..

يجب عليك و كشاب روش انك تفرج الناس كلها على ملابسك الداخلية وتعرفهم انه ماركة كبيرة

صناعة مصرية فاخرة تقفيل غزل المحلة ...
لازم بنطلونك كمان يختفي قدر الامكان
وتنزله بحيث ان يكون زراير البنطلون مقاربة الي حد كبير ناحية الركبة ..
طبعا ماوصيكش على الحزام
لازم يكون الحزام شفاف او عليه قلوب حمرا برضه و التوكة بتاعته تكون على شكل جمجة كبيرة عليها سيفين ولا بيريتس اوف كاريبيان و يا سلام لو كانت جمجمة مدخنة !!
واحدهيسألني هو الحزام لازمته ايه اذا كان مش على وسطه
هقوله وهو البنطلون هيثبت ازاي يا عبقري على الركبة ؟ مش لازم حزام يربطه
ومافيش مانع حبل غسيل على كل رجل .. لو اتزنقت حبتين ..

نكمل رحلتنا مع البنطلون
بالنسبة للشباب الروش المعاصر اللى علطول بيعمل أبديت لقاعدة بيانات روشنته و معاصر كل درجات الموضة .. نحب نقول ان البنطلونات طلعت عليها موضة اليومين دول انها تكون مقطعة
وده طبعا زي ماحنا عارفين ده مشاركة من الشباب الروش الطحن مع اخوانه المطوحنين اللى هدومهم مقطعه فعلا ..
وبكده أتحدي اي انسان عاقل يعرف يفرق حاليا بين الشاب الروش الطحن و الشاب اللى مش روش و المطحون
الاتنين بناطيلهم مقطعه ..
الاول ملابسه الداخلية ظاهرة لانه مش لاقي حاجة تغطيها
والتاني ملابسه الداخلية ظاهرة برضه بس بمزاجه وبكيفه...
ومن هنا نقدر نستنتج ان الروشنه ماهي الا مشاعر وممارسة اجتماعية سليمة و شعور طيب من الاغنياء المتروشنين بمزاجهم مع اخوانهم الفقراء المتروشنين برضه .. بس غصب عنهم !!

بمناسبة البنطلون ..
احب احكي حكاية ظريفة جدا
يذكر ان فى احدي الجامعات المصرية – طبعا
ظهر شاب فلته كان مزنوق ومش عارف يعمل ايه فى الامتحان
تفتق ذهنه العبقري عن فكرة ذرية ( مع الاعتذار للامريكان ) .. وهي كتابة المنهج بالقلم الحبر على البنطلون
طب يعمل ايه المراقبين فى الولد ده ؟
هيقلعوه البنطلون فى اللجنة ؟
أكيد لا ؟ خصوصا ان الولد ده اسمه شكري شارلستون
وكل اللى فى لجنته بنات و اسمهم شيماء ( الاسم الرسمي لبنات مصر )
صعب قوي يقدر المراقبين يقنعوا شكري انه يقلع بنطلونه امام حشد من بنات كلهم اسمهم شيماء .. !!
ومن هنا ظهر انسان اكثر عبقرية من شكري شارلستون
يعتبر الاب الروحي للروشنه فى مصر
ونأسف يا جماعة اننا نذكر اسم الراجل
حاليا هو بيقضي عقوبة السجن لتعاطيه البانجو ..
الراجل ده اخترع ان كل واحد يكتب قصة حياته على بنطلونه
يعني باختصار تبص على البنطلون تلاقي عليه كتابات من كل شكل و نوع
وبكل الانواع
دي برضه فكرة روشانية عظيمة .. خاصة لمحبي الادب الانجليزي .. بنطلونك هيكون مرجع ليك!!

يتبع

نكمل يا رجالتنا

ألتي شيرت ..
حاولت اكشف فى المعجم عن كلمة تي شيرت لكن للاسف باءت المحاولات بالفشل
رغم ثقتي الكاملة انى مش هلاقي حاجة لسبب بسيط جدا !!
دي كلمة اعجمية ..
وبالتالي فقدامنا بديل من اتنين
يا قميص
يا فانلة ..
وانا شخصيا بفضل لفظ فانلة
حتي نفتكر بيها سوا الباك اليمين لمنتخب مصر فى الروشنة وزن الديك .. هيثم فانلة ..كان بيلعب ونج يمين فى مناخيره
هيثم فانلة كان معجزة مصر فى الروشنه
الله يمسيه بالخير حاليا فى السجن برضه قضيتين تحرش و تعاطي حشيش غير انه اتمسك مرتين فى حديقة الازهر و والميرلاند و الدائري ..
بيشم فى شراباته !!!

الدور الفوقاني بالنسبة لهيثم ملك للجيم
الجيم او صالة الالعاب الرياضية هي موضة القرن ال 21 لشباب مصر الروش
كل واحد من دول تحس انه طور ماشي فى الشارع
دراعه مش عارف يتنيه مش من العضلات طبعا ( من التعب فى التمرينات )
كل واحد ماشي و فارد صدره على الحياة كده ولا هامه حاجة ومع اول قفا من اي مخبر تلاقي الاسد بقي صرصار ..
هيثم كان عنده ثقة كاملة ان عضلة التراي و البينش هما اساس جمال الرجل ووسامته و جاذبيته
كل ماتشتغل على التراي
كل ماهتبقي هاي هاي ..
وبعد الاهتمام بالعضلات الفوقانية
يأتي الدور على التي شيرتات
لازمن و لابد و حتمن (!!) .. يكون التي شيرت ضيق بشكل غبي
قصير بشكل أغبي
انا افهم ان فيه بنات بتتعمد انها تقصر تي شيرتاتها و تظهر اجزاء من جسمهم
بشكل متعمد .. ومع اختلافي الكامل مع النقطة دي لكن الي حد ما مفهومة
اهي برضه بتقلب رزقها و أكل عيشها و عاوزة تلم العيون عليها لعل و عسي يطلع واحد اهبل يفكر يرتبط بيها اعجابا منه بكرشها ... !!

لكن المثير للدهشة فعلا و الاستعجاب ان يطلع شباب يبنوا برضه كرشهم وأجزاء من ضهرهم بتي شيرتات عجيبة
غالبا شباب اسمهم سوسن !!!

زي ما أتفقنا يا شباب ان فانلتك هتكون مستوحاة من روح فانلات الفقيد هيثم فانلة ..
يعني تقطع حته من عند الكتف
وحته من تحت
وتطير أول زرارين من حساباتك مع أول خناقة مع شباب الجامعة كلها على اي بنت حتي لو ماتعرفهاش ..
( ده بافتراض انك لابس قميص مش فانلة )
طبعا مانساش افكرك انك برضه هتكتب منهج الكيمياء على الفانلة اقتداءا
بالشهيد شكري على فانلتك وأكيد صورة لجيفارا رغم انك لا تعرف مين جيفارا
ولا كان بيبع ايه ؟
واحد هيقولي افهم من كده ان جيفارا كان بياع ؟
اّه كان بيبيع فانلات .. !!!

ثانيا الكلام : ..
تأكد تماما ان كلامك يكون عجيب و غريب و لا يمت بأي لغة على وجه الارض بصله
أكثر و بشده من استخدام اللغة الانجليزية على الفاضي و المليان ..
فمثلا كلمة زي طبعا نخليها .. افكورس لزوم الانزحة
و مش فاضي و الله .. نخليها سو بيزي و والله يا حجة ..
وهكذا ..
طبعا ناهيك عن استخدامك للالفاظ الغير اعتيادية
وانا هحاول هنا اذكرك بعض من الالفاظ المتروشنة اللى مالهاش معني و اللى يفهملها معني ماينساش يفتكرنا ينوبه فيها ثواب

-سنتح
-امرز
-سرتح
-طربن
-فنتش

واضح طبعا ان كلها افعال وكلها مالهاش معني محدد فى اللغة العربية
وقريبا باذن الله نطلب من الاخوة بمجمع اللغة العربية ضم هذه الافعال
للمعجم .. وربنا يجعله عامر و يكملها معانا بالستر ان شاء الله ...

معلومة من الكاتب : سمعت خير اللهم اجعله خير ..معلومة لا أعلم مدي صحتها
.. وهي ان اسرائيل لديها مراكز متخصصة أنشأتها خصيصا لتطوير اللغة العربية
!! .. لو كان ده إحدي نتاج تطويرهم .. فهنيئا لاسرائيل نجاحها الساحق ..

ثالثا : السلوكيات ..
دي نصائح ذهبية خدها مني بالف هنا و شفا
1 - الندالة كنز لا يفني
2 - السفالة شرف
3 – المعيلة واجب
4 – الرجولة مرض
5 – الشهامة هبل

..............

طبعا انا كده مريح الشباب

على الاخر

طبعا ازاى تكونى متروشنه للبنات مش هينفع اكتبها لانها هتكون مكتوبه بطريه مش ولابد

معلش طولت عليكم